E pamundur rritja e pagave nga grantet e komunave

Është vënë në pikëpyetje realizimi i premtimit të befasishëm të kryeministrit në largim Hashim Thaçi për rritjen e pagave prej 50 për qind për 25 mijë mësimdhënësit e nivelit parauniversitar.
Premtimet e kryeministrit Thaçi për rritje pagash të mësimdhënësve parauniversitar prej 50 për qind janë në kundërshtim me dokumentin e vetëm zyrtar për linjat buxhetore për vitin 2011, Kornizën Afatmesme të Shpenzimeve, shkruan e përditshmja Koha Ditore.

Njëkohësisht, këto premtime vijnë në një kohë kur draftbuxheti për vitin 2011, edhe pa këtë premtim është i bazuar në burimet financiare të paqëndrueshme, siç është rasti me shitjen e PTK-së, e cila nuk është miratuar nga Kuvendi mirëpo Qeveria e ka futur çmimin e saj si të hyrë buxhetore për vitin 2011, kanë thënë njohës të buxhetit.

Ndërkaq, drejtues të komunave pohojnë se rritja e proklamuar e pagave të mësimdhënësve të nivelit fillor dhe të mesëm është e pamundur të bëhet nga grantet e komunave, ashtu siç ka thënë një ditë më parë ministri i Arsimit, Shkencës dhe Teknologjisë, Enver Hoxhaj, se paratë e rritjes së pagave do të merren nga grantet e komunave.

Drejtues të komunave pohojnë se asnjë komunë nuk e ka paraparë në buxhetin e vet rritjen e pagave për këtë kategori mësimdhënësish, ndërsa komunat tashmë i kanë aprovuar buxhetet e tyre për vitin 2011.

Ndryshe, kryeministri në largim, Hashim Thaçi para disa dite befasisht para opinionit ka deklaruar se rritje të pagave prej 50 për qind për mësimdhënësit e nivelit fillor dhe të mesëm.