Kosova ekziston, nuk do të bisedohet për këtë çështje

Ambasadori i Britanisë së Madhe në Serbi, Stephen Wordsworth në një bisedë për gazetën serbe “Danas”, duke u përgjigjur në pyetjen se a është reale që në dialogun ndërmjet Beogradit e Prishtinës sërish të hapet çështja e statusit, ka thënë se shumica e çështjeve në Kosovë në një farë mënyre janë të lidhura me statusin.
“Beogradi e Prishtina e kanë parë se duhet filluar me bisedime për çështje të thjeshta kur të mësohen në takime dhe biseda, mund të bisedojnë edhe për çështje më të ndërlikuara”, ka vlerësuar Wordsworth.

“Shumica e çështjeve në Kosovë në një farë mënyre janë të lidhura me statusin, kështu që bisedat nuk do të jenë të lehta”, mendon ai, duke shtuar se është e qenësishme që bisedat të fillojnë më shpejt dhe se të dy palët të bëjnë përpjekje që të gjitha mosmarrëveshjet t’i zgjidhin në mënyrë konstruktive.

“Mirëpo, nga pikëpamja jonë, duke pasur parasysh mendimin e GJND-së, përkatësisht faktin se shumica e shteteve anëtare të BE-së, të Këshillit të Evropës dhe të OSBE-së e kanë njohur Kosovën, biseda për ekzistimin e Kosovës nuk është në rend dite”, ka theksuar ambasadori britanik.

Sipas tij, koha e vizatimit të kufijve të rinj ka kaluar.